विठ्ठलाच्या भेटीआधीच 3 महिला वारकऱ्यांचा मृत्यू
जेजुरी | प्रतिनिधी
जेजुरी अपघात आषाढी एकादशीच्या पार्श्वभूमीवर संत ज्ञानेश्वर महाराजांच्या पालखी सोहळ्यात घडला. पुणे जिल्ह्यातील जेजुरी येथे सोमवारी (13 जुलै) सकाळी पालखीसोबत चालणाऱ्या वारकऱ्यांच्या गर्दीत शिधा वाहून नेणारा ट्रक घुसल्याने तीन महिला वारकऱ्यांचा जागीच मृत्यू झाला, तर 16 ते 18 वारकरी जखमी झाले. या घटनेमुळे संपूर्ण वारकरी संप्रदायावर शोककळा पसरली आहे.
मिळालेल्या माहितीनुसार, संत ज्ञानेश्वर महाराजांची पालखी सासवड येथील मुक्काम आटोपून जेजुरीच्या दिशेने निघाली होती. पहाटेपासून हजारो वारकरी विठ्ठल नामाचा गजर करत पायी मार्गक्रमण करत होते. जेजुरीजवळील भोंगळे मळा परिसरात पालखीसोबत शिधा घेऊन जाणारा ट्रक अचानक चालकाच्या ताब्याबाहेर गेला. भरधाव ट्रकने मागून वारकऱ्यांच्या समूहाला जोरदार धडक दिली. धडकेनंतर अनेक वारकरी रस्त्यावर फेकले गेले आणि घटनास्थळी एकच गोंधळ उडाला.
या भीषण अपघातात राजश्री शंकर भोसले, माधवी राजाराम सरवडे आणि नंदा पवार या तीन महिला वारकऱ्यांचा मृत्यू झाला. तिन्ही महिला सांगली जिल्ह्यातील असून त्या आषाढी वारीसाठी संत ज्ञानेश्वर महाराजांच्या पालखीसोबत पायी पंढरपूरकडे निघाल्या होत्या. विठ्ठलाच्या दर्शनापूर्वीच त्यांच्यावर काळाने झडप घातल्याने वारकरी भाविकांमध्ये शोककळा पसरली.
अपघातात जखमी झालेल्या 16 ते 18 वारकऱ्यांना तातडीने जवळच्या रुग्णालयात दाखल करण्यात आले. काही जणांची प्रकृती गंभीर असल्याची प्राथमिक माहिती समोर आली होती. वैद्यकीय पथकाकडून जखमींवर उपचार सुरू असून प्रशासनाकडून परिस्थितीवर लक्ष ठेवण्यात येत आहे.
जेजुरी अपघात नेमका कसा घडला?
प्राथमिक माहितीनुसार, अपघातग्रस्त ट्रक हा पालखीसोबत शिधा घेऊन जात होता. हा ट्रक नांदेड जिल्ह्यातील असल्याचे सांगितले जात आहे. पुरंदरचे आमदार विजय शिवतारे यांनी दिलेल्या माहितीनुसार, ट्रक चालकाचे वय सुमारे 70 वर्षे असून त्याने तापाच्या गोळ्या घेतल्यामुळे त्याला ग्लानी आली. त्यामुळे ट्रकवरील नियंत्रण सुटून वाहन थेट पुढे चालणाऱ्या वारकऱ्यांच्या गर्दीत घुसल्याची प्राथमिक माहिती समोर आली आहे. मात्र अपघाताचे नेमके कारण चौकशीनंतरच स्पष्ट होणार असल्याचे प्रशासनाने सांगितले आहे.
घटनेची माहिती मिळताच पोलिस, महसूल प्रशासन, आरोग्य विभाग आणि आपत्कालीन यंत्रणा तातडीने घटनास्थळी दाखल झाल्या. जखमींना त्वरित रुग्णालयात हलविण्यात आले. अपघातानंतर काही काळ परिसरात तणावाचे वातावरण निर्माण झाले होते. पोलिसांनी वाहतूक सुरळीत करत घटनास्थळाचा पंचनामा सुरू केला असून ट्रक चालकाची चौकशी तसेच वाहनाची तांत्रिक तपासणी करण्यात येणार आहे.
दरम्यान, या दुर्घटनेवर विविध स्तरातून शोक व्यक्त करण्यात येत आहे. राष्ट्रवादी काँग्रेस (शरद पवार गट) चे आमदार रोहित पवार यांनी या घटनेबद्दल दुःख व्यक्त करत जखमी वारकरी लवकर बरे व्हावेत, अशी विठ्ठल चरणी प्रार्थना केली. तसेच अपघाताची सखोल चौकशी करून भविष्यात अशी घटना पुन्हा घडू नये यासाठी प्रशासनाने ठोस उपाययोजना कराव्यात, अशी मागणीही त्यांनी केली.
या अपघातानंतर पालखी मार्गावरील सुरक्षा व्यवस्थेचा मुद्दा पुन्हा ऐरणीवर आला आहे. लाखो वारकरी सहभागी होत असलेल्या आषाढी वारीदरम्यान वाहनांच्या हालचालींवर अधिक प्रभावी नियंत्रण, स्वतंत्र सुरक्षा व्यवस्था, वाहतूक नियोजन आणि आपत्कालीन यंत्रणा अधिक सक्षम करण्याची गरज असल्याची भावना व्यक्त होत आहे. श्रद्धा, भक्ती आणि समर्पणाचे प्रतीक असलेल्या आषाढी वारीला लागलेले हे दुर्दैवी गालबोट संपूर्ण महाराष्ट्रासाठी वेदनादायी ठरले आहे.
जेजुरी अपघाताची चौकशी
आषाढी वारी ही महाराष्ट्राच्या सांस्कृतिक आणि आध्यात्मिक परंपरेचे प्रतीक मानली जाते. संत ज्ञानेश्वर महाराज, संत तुकाराम महाराज यांच्यासह विविध संतांच्या पालख्या लाखो वारकऱ्यांसह पंढरपूरच्या दिशेने मार्गस्थ होतात. या पालखी सोहळ्यात केवळ वारकरीच नव्हे, तर दिंडीच्या व्यवस्थापनासाठी अनेक सहाय्यक वाहनेही सहभागी असतात. वारकऱ्यांच्या अन्नधान्याचा शिधा, पिण्याचे पाणी, भांडी, तंबू, वैद्यकीय साहित्य, ध्वनी व्यवस्था तसेच इतर आवश्यक साहित्य वाहून नेण्यासाठी ट्रक, टेम्पो, ट्रॅक्टर-ट्रॉली, पिकअप वाहने आणि इतर मालवाहू वाहनांचा वापर केला जातो. ही वाहने दिंडीसोबत नियोजित पद्धतीने प्रवास करतात.
read this news ; कुर्डूवाडी-बार्शी रोडवर भीषण अपघात; आईचा जागीच मृत्यू, वडील-मुलगी 2 गंभीर जखमी ;
जेजुरी अपघातानंतर पालखी मार्गावरील सुरक्षेचा प्रश्न
पालखी मार्गावर साधारणपणे रस्त्याच्या एका बाजूने ही वाहने नियंत्रित वेगाने सोडली जातात, तर दुसऱ्या बाजूने हजारो वारकरी टाळ-मृदंगाच्या गजरात आणि विठ्ठल नामाचा जयघोष करत पायी चालत असतात. त्यामुळे पालखी मार्गावर वाहनचालकांनी अत्यंत सावधगिरी बाळगणे आवश्यक असते. पोलिस, स्वयंसेवक आणि प्रशासन वाहतूक सुरळीत ठेवण्यासाठी प्रयत्न करत असले तरी एवढ्या मोठ्या संख्येने वारकरी आणि सहाय्यक वाहने एकाच मार्गावर असल्यामुळे प्रत्येक वाहनचालकाने नियमांचे काटेकोर पालन करणे आणि वेगावर नियंत्रण ठेवणे अत्यंत महत्त्वाचे मानले जाते.
अपघाताची माहिती मिळताच उपमुख्यमंत्री सुनेत्रा पवार यांनी तातडीने घटनास्थळी धाव घेतली. त्यांनी जखमी वारकऱ्यांची रुग्णालयात जाऊन विचारपूस केली तसेच डॉक्टरांकडून त्यांच्या प्रकृतीची माहिती घेतली. जखमींवर तातडीने योग्य उपचार करण्याच्या सूचना त्यांनी केल्या.
